Banane Të Pjekura

04/12/2018

Bananet e pjekura janë besoj receta më e thjeshtë dhe praktike. Përbërës që me shumë gjasa na ndodhen gjithmonë në shtëpi dhe për mua është zgjidhja ideale e ëmbëlsirës kur kam miq të papritur. Mjafton të jeni pak kreativ me vendosjen e ëmbëlsirës në pjatë, dhe do ta ktheni këtë recetë nga bazike në pjatë restoranti.

Dërrasa e punuar aq bukur dhe në ngjyrat tona të preferuara është prodhim artizanal i Oniro Studio.

  • Bananet mund ti lini të plota, ose ti prini në mes.
  • Vendosja e një letre furre poshtë do t’ju shpëtojë jetën, prandaj mos e neglizhoni këtë hap.
  • Këtu do të dalloni nëse mjalti që keni blerë është i cilësisë së mirë ose jo. Nëse nuk është do të digjet shumë shpejt dhe do t’ju prishë të gjithë ëmbëlsirën. Kështu që sigurohuni të përdorni mjalt “të vërtetë”.

Proçedura:

 

Ndizni furrën në temperaturë 190°C.

Shtroni një letër furre në një tepsi normale ose biskotash.

Vendosni afër e afër bananet e plota ose të prera, kjo është në dorën tuaj.

Shtoni mjaltin sipër bananeve, mos u kurseni në mjaltin e përdorur. Do t’ju duhet sasi pasi gjatë pjekjes mjalti do të fillojë të vlojë dhe të kthehet në ngjyrë kafe dhe nëse keni pak në sasi ky hap do të jetë i shpejtë dhe mund të digjet para se bananet tuaja të jenë zbutur.

Shtydh 1 portokall të vogël (në varësi të sasisë së bananeve që po gatuani) mbi bananet dhe më pas shtoni bajamet jo të kripura. Sasia e këtyre të fundit mbetet në dorën tuaj.

Piqini bananet për 15-25 min në varësi të nëse i keni lënë të plota ose të prera në mes. Duhet që kur të ngulni një thikë në mes të bananes ajo të jetë e butë, por jo e qullët.

Hiqeni nga furra dhe transferojni bananet e nxehta në pjatën servirëse. Nëse e lini këtë hap për më vonë do të jetë shumë e vështirë, pasi mjalti do të jetë mpiksur.

Sitni pak kanellë nëse dëshironi.

 

Fotografitë nga Eranda Janku